Гратэскны крамлёўскі фарс ператвараецца ў крывавую трагедыю
Пракрамлёўскія выдумкі не могуць пераканаць нікога, акрамя аўдыторыі пракрамлёўскіх СМІ
На працягу апошніх дзён, тыдняў, месяцаў і гадоў мы ў EUvsDisinfo дзяліліся сваім разуменнем анатоміі пракрамлёўскіх дэзынфармацыйных кампаній, абмяркоўвалі іх тактыку і супрацьстаялі таксічным наратывам, накіраваным на падман і адцягванне грамадзян і асоб, якія прымаюць рашэнні.
Паколькі напружанасць, якую стварае Расія, зараз узрасла да кропкі кіпення, мы разам з іншымі членамі супольнасці развянчання міфаў і праверкі фактаў сталі сведкамі таго, што пракрамлёўская дэзынфармацыя ўсё больш адрываецца ад рэальнасці, а часам і з нерэальнай хуткасцю.
Апошнія сумныя прыклады ўключаюць у сябе нібыта абстрэлы ўкраінскімі ўзброенымі сіламі з хірургічнай дакладнасцю нікчэмнай халупы на адлегласці амаль 40 кіламетраў ад лініі судакранання, сцвярджэнні, што ўкраінскія войскі праніклі на тэрыторыю Расіі з тэхнікай, якой яны не валодаюць, і сцвярджэнні, што ўкраінская армія абстраляла дзіцячы сад, які знаходзіцца на ўласнай тэрыторыі.
Можна было падумаць, што пракрамлёўскія СМІ ўвогуле спынілі спробы пераканаць у чым-небудзь каго-небудзь за межамі Расіі. Тым не менш, трэба адзначыць, што нават няўмелыя выдумкі з’яўляюцца падступнымі і шкоднымі, асабліва калі ўлічыць, што крамлёўскія дэзынфармацыісты ўжо некаторы час закладвалі аснову для падзей, якія разгортваюцца цяпер.
Нацысты, якія хаваюцца за кожным вуглом, вялікія гуманісты і размовы аб ядзернай зброі
Мы вывучалі паўгадавую рыторыку расійскіх дзяржаўных СМІ, пракрамлёўскіх выданняў, звязаных з расійскай дзяржавай, а таксама афіцыйныя дыпламатычныя акаўнты Расіі ў Twitter.
Мы пачалі з падліку аб’ёму згадак ключавых слоў, звязаных з Украінай, у спалучэнні з ключавымі словамі, якія прадстаўляюць наратывы casus belli, або выдумкамі, якія выкарыстоўваюцца як падстава для ўварвання ва Украіну.
Напрыклад, пракрамлёўскія выданні паслядоўна адлюстроўваюць Украіну як «нацысцкую» дзяржаву, каб ачарніць украінцаў, асабліва ў вачах унутранай расійскай аўдыторыі, і такім чынам апраўдаць агрэсію Крамля. Мы назіралі гэтую тактыку шмат разоў, у тым ліку ў 2015, 2016, 2017, 2018, 2019, 2020, 2021 гадах і, вядома, на працягу апошніх шасці месяцаў, як паказана на дыяграме ніжэй.
Менавіта такое прадстаўленне Украіны як «нацысцкай» дзяржавы дало магчымасць расійскім кантраляваным дзяржавай СМІ і палітыкам, якія цяпер знаходзяцца пад санкцыямі, зрабіць жахлівыя і цалкам сфабрыкаваныя абвінавачванні ў генацыдзе на Данбасе і раскручванне дзікіх тэорый змовы аб Украіне з выкарыстаннем хімічнай і іншай забароненай зброі.
Ключавое слова — нацысты, Ключавое слова — генацыд, Ключавое слова — хімічны
Мы таксама выявілі, што для падтрымкі Расіяй (а цяпер і прызнаных Крамлём) бандытаў, якія кіруюць так званай «ЛНР» і «Данецкай народнай рэспублікай (ДНР)», пракрамлёўскія СМІ спрабавалі паказаць уласную агрэсію Расіі як гуманітарную місію.
Рэзка павялічылася колькасць згадак ключавога слова «бежанец», якія суправаджаліся папярэдне запісанымі і сінхранізаванымі заявамі лідараў так званых «ДНР» і «ЛНР» аб масавай «эвакуацыі» (чытай: прымусовага перасялення) мірнага насельніцтва з Данбаса ў Расію.
Ключавое слова — бежанец
У той час як падкантрольныя Крамлю СМІ перапоўненыя выявамі жанчын, дзяцей і старых, якія прыбылі ў Расію, яшчэ засталіся незалежныя расійскія СМІ, якія сабралі сведчанні людзей у так званых «ДНР» і «ЛНР», якія выразна кажуць, што не вераць расійскай прапагандзе, не жадаюць пакідаць свае дамы і не лічаць Украіну ворагам. Але не дазволім фактам сапсаваць добрую і эмацыйна маніпуляцыйную гісторыю.
Ключавое слова — ядзерны
Нарэшце, аб’ём згадак ключавога слова «ядзерны» ў кантэксце Украіны няўхільна расце з лістапада 2021 года. Гэта адпавядае вайсковай пазіцыі Расіі і вольным размовам пракрамлёўскіх СМІ пра ядзерную зброю і ваенную моц краіны. Апошні прыклад уключае санкцыянаванага Еўрасаюзам прапагандыста Дзмітрыя Кісялёва, які падзякаваў «таварышу Сталіну і Берыі» (апроч іншых) за стварэнне расійскай ядзернай зброі.
Гратэскавая п’еса ў дзвюх дзеях, каб спадабацца галоўнаму дэзынфармацыйніку
Вялікая частка пракрамлёўскай дэзынфармацыі накіравана на хатнюю аўдыторыю як заклік да падтрымкі імперскіх амбіцый і ваеннага авантурызму Крамля. У прыватнасці, гэтая дэзінфармацыя мае на мэце спадабацца аўдыторыі таго, хто сядзіць у Крамлі, ці недалёка ад Сочы, ці ў нейкім невядомым месцы, ізаляваным ад астатняга свету.
Гэтая аўдыторыя была цэнтральнай фігурай у старанна арганізаванай гульні з двух актаў, падчас якіх часам парушаліся правілы фізікі і прасторава-часавы кантынуум. Спачатку адбылося пастановачнае пасяджэнне Савета бяспекі Расіі, напоўненае нязграбнымі тэатралізацыямі, у тым ліку здзекамі ў школьным двары. Гэта пасяджэнне стала сцэнай не толькі для парушэння міжнароднага права ў выглядзе паспешна скапіяванага і ўстаўленага прызнання так званых «ЛНР» і «ДНР», але і для дасягнення новых вышынь дэзынфармацыі ў другой дзеі.
Другая дзея гэтай гратэскавай п’есы мела форму шырокай тэлевізійнай прамовы, у якой была прадстаўлена сукупнасць самых вялікіх хітоў пракрамлёўскай дэзынфармацыі з 2014 года, у якіх сцвярджалася, што:
- Сучасная Украіна была стварэннем Расіі, тым самым адмаўляецца суверэнітэт і дзяржаўнасць Украіны. Мы развянчалі гэты небяспечны міф шмат разоў, як і іншыя.
- Украіна знаходзіцца пад замежнымі ўладай і ўплывам і выкарыстоўваецца як інструмент супраць Расіі. Гэта яшчэ адзін таксічны аповед, які часта выкарыстоўваецца і які мы шмат разоў развянчалі.
- Рускамоўныя і этнічныя рускія ва Украіне падвяргаюцца пераследу ці нават робяцца ахвярамі генацыду, што, відавочна, не адпавядае рэчаіснасці. Іншыя таксама развянчалі гэтыя безадказныя абвінавачванні.
- Цяпер Украіна нібыта адказная за васьмігадовую вайну на Данбасе і, як сцвярджаецца, выношвае планы вайсковага вырашэння праблемы. Як вядома, гэтыя сцвярджэнні хлуслівыя. Расійскія лідары разам са сваімі даверанымі асобамі — сапраўдныя агрэсары, якія падрываюць суверэнітэт і тэрытарыяльную цэласнасць Украіны.
- Агрэсія ЗША і НАТО так ці інакш пагражае Расіі. Яшчэ адна паўтаральная прэтэнзія, якая была шмат разоў развянчаная.
Гэтая крамлёўская п’еса дала нам магчымасць зазірнуць у свядомасць кіруючага самадзержца і яго падручных. Калі пракрамлёўская дэзынфармацыя была часам блазнерскай у сваіх адчайных выдумках і абсмейвалася заходняй аўдыторыяй і аналітыкамі, абсурдная трагікамедыя Крамля была ашаламляльным поглядам у будучыню. Пракрамлёўская аўдыторыя відавочна прыслухоўвалася да хлусні, якую ў апошнія гады выплёўвала ўласная крамлёўская машына, і стала, па іроніі лёсу, самай значнай ахвярай дэзынфармацыі.
Рэдакцыя: [24/02/2022 – 10:52]: Гэты тэкст быў напісаны за некалькі гадзін да чарговага неапраўданага нападу Крамля на Украіну. #StandWithUkraine
